الحب بُمب وفرقعة

الحب بُمب وفرقعة
ولا فهش ريحة المجدعة
الحب دا قلة أدب
وشباب أغاني ومرقعة
ماسك إديها وقال يا عي
ني الواد خلاص دايب بقا
ويقول لها يلا اسمعي
دقات فؤاد داب مالشقا
نفسي في عش يضمنا و
بوسة هنا وبوسة هنا
وبمسخرة وقلة أدب
 يرقص معاها بشخلعة
دالحب دا قلة أدب
وشباب أغاني ومرقعة
ويبقا ماشي في الطريق
وتحت شباكها يقف
يدّيها صوت عالي وجريء
وهي في الشباك تقف
وفي البداية يسلموا
وفي حبهم يتكلموا
من غير خشا ومن غير أدب
بوسة ولبانة وطرقعة
دالحب دا قلة أدب
وشباب أغاني ومرقعة
بينهم على الكورنيش ميعاد
الساعة خمسة بتبتدي
حكايات عن الشوق والعناد
قاسي... لا أنتي بتبعدي
ويزيدوا في الشوق وفكلام
مليان هوا ومليان غرام
أوقات تضيع يا للعجب
ساعتين تلاتة وأربعة
دالحب دا قلة أدب
وشباب أغاني ومرقعة
يالي أنتو سايقين في العبط
فيكم حاجات كتير غلط
قبل الهوى وقبل الغرام
أخلاقكو لازم تنظبط
دشبابنا عايز ينضرب
وبنات كتير متدلعة
دالحب دا قلة أدب
وشباب أغاني ومرقعة

هَحن لك

مش قلتلك

إني فيوم هحن لك

مهما تروح

مهما تغيب

مانت الحبيب

وأنت الوحيد اللي وهبت القلب لك

مش قلتلك

إني فيوم هحنلك

هانت عليك

لحظة خدتني الدنيا فيها بشوق إليك

ويهون عليك

حضنك لإيدي لما تبقى بين إيديك

وان غبت عنك يوم تقل لي اشتقتلك

مش قلتلك

 إني فيوم هحنلك

طال الغياب

واستنا قلت يجيني منك يوم جواب

مليان عتاب أو فيه سلام

ولا شفت منك غير خصام

فبعتلك

مش قلتلك

 إني فيوم هحنلك

إيه أخرك

عني وانا باستنظرك

أرجع قوام

مش بأمُرَك

دانا بس باتمناك تعود والأمر لك

مش قلتلك

 إني فيوم هحنلك.

مش بإيدي

مش بإيدي
حبكم والله يا سيدي
دم وبيجري في وريدي
 لو خلص مرة هموت

نفسي طلة
منكم تحييني والله
دي الحياة غيركم مزلة
دي الحياة من غيركو موت

لو تيجوني
تمسحوا دمعة عيوني
دانتو أفراحي وشجوني
بيكو هحيا لو بموت

يا حياتي
لما اكون جنبك ليلاتي
بانسى أحزاني وآهاتي ف
شعر همسك والسكوت.

آه بحبك

آه بحبك طول ماقلبي فيه حياة

آه بحبك حتى لو قلتيلي لا

آه بحبك حتى لو غاب عن عينيا

قلبك اللي باعشقه ودبت في هواه

مش منايا تكوني جنبي الليل بطوله

مش منايا تسمعي كل اللي أقوله

داللي باتمناه ونفسي فيوم أنوله ت

سيبي قلبي يعيش هواكِ لمنتهاه

سيبي قلبي يدوق حلاوة الشوق في بعدك

سيبي قلبي يعيش ما بين صدك وردك

وأن سمحلي مرة قلبك إني اودك

يبقى دا غاية رضى قلبي ومناه

سيبي عيني تنام وتحلم بابتسامة

من شفايف أحلى من أجمل حمامة

واما باسمع ضحكتك يلة السلامة

قلبي ينشد عالنغم أحلى غناه

يا حبيبة الروح يا أجمل من حبيبة

ياللي قلبك كله رقة وذوق وطيبة

عارف إنك حاسة إن انتي القريبة

مني وفإيدك رضى قلبي وهناه

يبقى ليه البعد عني ليه غيابك

ليه تقولي إن الهوى هيزيد عذابك

قلبي هيكون دنيتك هيكون صحابك

قلبي هيكونلك سفينة وطوق نجاة.

أليس لنا قلوب تنبض

بسم الله الرحمن الرحيم
أليس الكفيف إنسانا
كثير من الناس لا يعترفون بحق الكفيف في الحياة, يظنون أن الكفيف لا يعنيه شيء في حياته إلا الأكل والشرب وتحقيق كل ما يريده من شهوات وغرائز.
هل هذا صحيح؟ أخبروني بالله عليكم أهذا صحيح؟

تقول الروح

تقول الروح شاكيةً هواها
لمحبوب تنكر للمحبِ
ألا يكفيك أن الشوق أضنى
فؤادي مذ هواك أصاب قلبي
ألا يكفيك أن العمر أحيا
على حلم بأن ألقاك حِبي
وأنتظر اللقاء ولا تبالي
وتسعد بالفراق وليس قربي
ألا يا أيها المحبوب رفقاً
بقلب قد أصيب بفرط حبي
فلا تقسُ عليه وكن رحيماً
به فالشوق أضناني وربي.